قومی کرکٹ ٹیم کے سابق کپتان سلمان بٹ نے 15 فروری کو ہونے والے ہائی پروفائل پاک بھارت تصادم سے قبل پاکستان کی پوزیشن کو مضبوط قرار دیتے ہوئے کہا ہے کہ ایک ہی مقام، ماحول اور موسمی حالات میں مسلسل رہنے اور پریکٹس کرنے کی وجہ سے پاکستان کو واضح فائدہ حاصل ہے۔
انہوں نے کہا کہ جب بھی کوئی ٹیم باہر سے آتی ہے تو اسے نئی کنڈیشنز سے ہم آہنگ ہونے میں وقت لگتا ہے جب کہ پاکستانی کھلاڑی پہلے سے ہی پوری طرح ہم آہنگ ہیں۔ اگرچہ ہندوستانی ٹیم تجربہ کار کھلاڑیوں پر مشتمل ہے لیکن نئے مقام پر کھیلنا شروع کرنے کا مطلب نئے سرے سے آغاز کرنا ہے جس کا یقیناً پاکستان کو فائدہ ہوگا۔
پچوں کا تجزیہ کرتے ہوئے سلمان بٹ نے کہا کہ اگر میچ کے دوران سطحیں سست رہیں اور اسپنرز کی مدد کریں تو پاکستان کا ہاتھ اوپر رہے گا کیونکہ ان کی پلیئنگ الیون میں پانچ سے چھ اسپن آپشنز شامل ہیں۔
میچ کی اہمیت پر زور دیتے ہوئے انہوں نے کہا کہ ایسوسی ایٹ ٹیموں کو شکست دینے سے اگلے مرحلے کے لیے کوالیفائی کرنے میں مدد مل سکتی ہے لیکن سپر ایٹ جیسے اہم مرحلے سے قبل بھارت کے خلاف یہ بڑا میچ ٹیم کی اصل طاقتوں اور کمزوریوں کو سمجھنے کے لیے انتہائی اہم ہے۔
ان کے مطابق یہ میچ اس لیے بھی اہم ہے تاکہ ٹیم انتظامیہ نتائج کی بنیاد پر مستقبل کی حکمت عملی کو بہتر بنانے کا اندازہ لگا سکے۔
