سری لنکا کے بعد امارات کرکٹ بورڈ نے بھی پاکستان سے درخواست کی ہے کہ وہ بھارت کے خلاف 15 فروری کا میچ نہ کھیلنے کے اپنے فیصلے پر نظر ثانی کرے۔
رپورٹ کے مطابق ایمریٹس کرکٹ بورڈ نے پاکستان کرکٹ بورڈ (پی سی بی) سے رابطہ کیا اور باضابطہ طور پر بھارت کے کھیل کو نہ چھوڑنے کے فیصلے پر نظرثانی کا کہا۔ بورڈ نے کرکٹ کے بہترین مفاد میں فیصلہ کرنے کی سفارش کی۔
اس سے قبل سری لنکا نے بھی پاکستان سے آئی سی سی مینز ٹی ٹوئنٹی ورلڈ کپ 2026 میں روایتی حریف بھارت کے خلاف میچ کے بائیکاٹ پر نظر ثانی کی اپیل کی تھی۔
رپورٹس میں بتایا گیا کہ سری لنکا کرکٹ نے باضابطہ طور پر پی سی بی کو خط لکھا، جس میں اس بات کی نشاندہی کی گئی کہ 15 فروری کو کولمبو میں شیڈول اس ہائی پروفائل میچ کو منسوخ کرنے سے سری لنکا کرکٹ کو کافی مالی نقصان ہوگا۔
سری لنکا کرکٹ کے بیان میں کہا گیا ہے کہ کسی بھی عدم شرکت کے دور رس اثرات ہوں گے، جس میں بڑے مالی نقصانات اور سیاحت کی متوقع آمدنی میں کمی شامل ہے۔ ٹکٹوں کی فروخت اور میزبانی کے انتظامات سمیت پاک بھارت میچ کی تمام تیاریاں پہلے سے ہی مکمل تھیں۔
سری لنکن میڈیا کے مطابق پاکستان کے بائیکاٹ کے اعلان سے سری لنکا کا سیاحتی شعبہ متاثر ہوا، بہت سے شائقین نے ہوٹل کی بکنگ منسوخ کردی۔ خط میں کہا گیا کہ سری لنکا کرکٹ نے مشکل وقت میں پی سی بی کا ساتھ دیا۔
سری لنکا کرکٹ نے درخواست کی کہ پاکستان غیر معمولی حالات، بورڈز کے درمیان دیرینہ تعلقات اور کرکٹ کے وسیع تر مفادات پر غور کرے۔
یہ امر اہم ہے کہ حکومت پاکستان نے مردوں کی کرکٹ ٹیم کو ٹی ٹوئنٹی ورلڈ کپ میں روایتی حریف بھارت کے خلاف کھیلنے سے روک دیا ہے۔
دریں اثنا، آئی سی سی پاکستان کو قائل کرنے کی کوششیں جاری رکھے ہوئے ہے۔ آئی سی سی کے ڈپٹی چیئرمین عمران خواجہ نے پی سی بی کے چیئرمین محسن نقوی سے ملاقات کی، بنگلہ دیش کرکٹ بورڈ کے صدر امین الاسلام بھی موجود تھے۔
ذرائع کا کہنا ہے کہ ملاقات کا ایجنڈا پاکستان کو ٹی ٹوئنٹی ورلڈ کپ میں بھارت کے خلاف راؤنڈ میچ کھیلنے پر راضی کرنا ہے۔
